栢芝前助手Christine最極積極宣揚佢「女人，肥都要靚要命要自信！」嘅精神。(網上圖片)

「女人，肥都要靚要命要自信！」呢句說話應該係唔少身型比較肥的女士嘅心聲，而最近更有絲打喺討論區開出以「女人，肥都要靚要命要自信！」為題嘅po，為身型比較肥的女士發聲，而呢位開po的絲打並唔係一位普通人，而係曾喺張栢芝初出道時擔任其助手、亦曾經喺03年書展出過勵志減肥書《我要終身美麗》嘅Christine霍俊楊。

Christine喺各大討論區開po講述佢由260磅減到130磅並差啲冇命嘅經歷。(網上圖片)

Christine最近積極喺各大網上討論區開po宣揚佢「女人，肥都要靚要命要自信！」嘅精神，為肥女人發聲。佢話最近睇到報章一段有關「我知我肥」的新聞有感而發，話自己最肥時曾經去到260磅，亦都因為肥受到好多不公平對待，當時因此消極地以「橫豎都係死，咪試下餓唔餓得死囉」的心態節食減肥，結果佢話自己因為咁搞到差啲冇命:「結果一年內餓到130磅，係瘦咗喎，仲有人搵我出書寫專欄，但我想講，我差啲連命都冇呀。」所以之後佢便立定決心，45歲嘅Christine唔再減肥，但一定要靚，睇佢而家嘅相真係唔似真實年齡。「依家我唔介意肥，唔介意俾人話我肥，我仲好貪靚、鐘意扮靚。啲人成日話要靚唔要命，傻㗎咩？邊有人唔要命㗎。我就話，做人最緊要有自信！」

當時未減肥嘅Christine是咁的，一拍埋栢芝度真係差2個碼。(網上圖片)

減肥後的Christine是咁的。(網上圖片)

呢個post一出，唔少絲打都表示支持，而Christine亦以「美More女Christine」為名開咗fb專頁，講述當時節食減肥引起嘅一連串身體問題:「10個月內瘦咗130磅，但嘔咗兩次血，身體差到不得了。」依家嘅Christine並冇刻意減肥，佢亦積極向各位宣揚肥嘅女人一樣可以好靚嘅精神。

Christine喺2003年書展仲出過呢本勵志減肥書《我要終身美麗》。(網上圖片)